Jimmy Bondoc inilalaban pagtakbo ni Robin bilang VP ni Sara Duterte sa 2028

NANINIWALA ang singer-songwriter na si Jimmy Bondoc na pwedeng-pwedeng maging ka-tandem ni Vice President ni Sara Duterte si Sen. Robin Padilla sa Eleksyon 2028.

Aprubado kay Atty. Bondoc ang posibleng pagtakbo ni Padilla bilang bise presidente ni VP Sara na nag-anunsyo na nga ng kandidatura sa pagkapangulo sa susunod na halalan.

"I mean right now, loyalty is the most precious commodity and Robin has exhibited that," ang sabi ni Jimmy sa panayam ng programang "Sa Totoo Lang" ng One PH kamakailan.

Nakikita raw kasi niya ang "sincerity" at "willingness" ng action star-politician na ipaglaban at manindigan sa iba't ibang isyu ng lipunan kahit na alam niyang maraming kokontra o magagalit sa kanya.

"If you notice, there has been quite a reversal regarding the public opinion of Robin even in certain political stalwarts. Kasi right now, nakita na po natin na importante naman po talaga ang edukasyon," ani Jimmy.

Aniya pa, "Pero makikita natin talaga 'yong power ng sinseridad at 'yong talagang willingness to fight even for the uncomfortable issues."

"He has taken on very sensitive issues such as gender issues, divorce, and constitutional changes. So baka 'yun ang pinakamaganda rin, again, among the very good candidates for VP.

"Because ang Vice President usually is an advocate and si Robin is a very strong advocate of even difficult issues," pahayag pa ni Bondoc.

Kamakailan ay nasabi ni Padilla na handa siyang tumakbong bise presidente ni VP Sara sakaling iutos ito sa kanya ni dating Pangulong Rodrigo Duterte.

"Ipinanganak po tayong ready. Lalo na 'yan, para sa akin…vice president, hindi naman masyadong ano yan…puro advocacy lang 'yan, eh.

"Parang ikaw ang spare tire, 'di ba? Kayang-kaya 'yan," ang kumpiyansang sabi ni Sen. Robin sa panayam ng media.

Aniya, nakahanda raw siyang tumakbong VP ni Sara Duterte kapag inutusan o sinabihan siya ni dating Pangulong Rodrigo Duterte.

"Kapag utos ni Digong (tatakbo). Walang pwedeng mag-utos sa akin kahit sino, si Digong lang.

"Kasi ayaw ko talaga ng politika, alam naman lahat ng…nanay ko alam yan, mga kapatid ko, asawa ko. Basta sinabi ni Digong susunod ako," sabi pa ng asawa ni Mariel Rodriguez.

The post Jimmy Bondoc inilalaban pagtakbo ni Robin bilang VP ni Sara Duterte sa 2028 appeared first on Bandera.