5 Rescuer sa Bulacan Nasawi habang Tumutulong sa mga Nasalanta ng Bagyo | Rest In Peace Sa Ating Mga Bayani

Nasawi ang limang rescuers sa Bulacan, habang ginagampanan ang kanilang tungkulin sa kasagsagan ng baha sa Sitio Galas, Barangay Kamias, San Miguel, bunsod pa rin ito ng pananalasa ng Bagyong Karding.

Kinumpirma ni Daniel Fernando, Gobernador ng Bulacan, kung saan limang personnel ng PDRRMO (Provincial Disaster Risk Reduction and Management Office) ang inanod ng baha at nalunod, habang nagsasagawa ng kanilang rescue operations.

Kinilala ang limang magigiting na rescuer, na sina George Agustin, Narciso Calayag Jr., Troy Justin Agustin, Jerson Resurreccion at Marby Bartolome.

Nasira umano ang kanilang sinasakyang truck kaya naman gumamit na lamang sila ng isang rescuer boat patungo sa sa kanilang destinasyon, kung saan sila magsasagawa ng operasyon.

Isang pader ang gumuho at tumama sa sinasakyang bangka ng limang rescuer, na dahilan upang maanod at malunod sila sa baha.

Magkakahiwalay namang natagpuan ang mga labi ng mga bayaning rescuer sa mga lugar ng Sitio Galas, Kamias, San Miguel, Bulacan.

Tiniyak naman ng Gobernador ng Bulacan, Daniel Fernando, na magbibigay sila ng tulong sa mga pamilya ng nasawing mga rescuers. Iniutos na rin niya ang pag autopsy sa mga labi upang makumpirma kung nakuryente ba ang mga ito pag kataob ng bangka.