REVIEW: ‘Manila’s Finest’ ni Piolo Pascual may ipinaglalaban, maraming hugot

SA totoo lang, hindi ko kaagad naintindihan ang "Manila's Finest" pero umalingawngaw sa akin ang mensahe ng pelikula matapos ko itong pagnilay-nilayan.

Gandang-ganda ako sa visuals ng "Manila's Finest" na entry sa Metro Manila Film Festival 2025. Nakakabilib ang aesthetic nila sa Old Manila, at may color grading itong parang isang lumang pelikulang Pilipino.

Mahilig akong manood ng independent films kaya may iba akong expectation habang pinapanood ang movie, pero kakaiba siya. Wala pa akong ibang napanood na tulad nito.

Pagkatapos ng pelikula, puro "Huh?" at "Yun na yon?" ang mga narinig ko sa sinehan. Kahit ako, hindi ko kaagad ito na-appreciate. Meron itong plot holes, maraming tanong na hindi nasagot, walang eventful na climax, at open-ended, pero marami pala itong hidden meaning.

Nagsimula ang istorya sa taong 1969 sa First Quarter Storm bago maitatag ang Batas Militar.

Bida rito si Homer Magtibay na ginampanan ni Piolo Pascual, isang miyembro ng Manila Police District o Manila's Finest kung tawagin nila. Partner niya sa serbisyo si Billy Ojeda na ginampanan ni Enrique Gil.

Umikot ang istorya sa mga problema ng pulis sa alitan ng mga nagbabanggang grupong Sputnik at Bahala na Gang, mga rally, at ang power struggle ng Philippine Constabulary MetroCom.

Noong napag-isipan ko ang message ng movie, marami siyang naiwan na problema dahil kahit noong Martial Law pa ang setting nito, hanggang ngayon ay ito pa rin ang political issues na nararanasan natin.

Anong gagawin mo kung ang Manila's Finest—o ang bansa mo—na pinakamahusay at pinakatinitingala noon ay "ginagamit" ng may malakas na kapangyarihan sa iba't ibang motibo at interes?

Magpapalamon ka na lang ba sa sistema, tatahimik, aalis, o lalaban? Mamamatay ka na lang ba nang walang nagagawa? Ilan lang ito sa mga tanong ng mga nakapanood sa pelikula.

Humakot din ito ng award sa MMFF 2025 Gabi ng Parangal at deserve naman nila ang napanalunang tropeo.

Nanalo ito ng 3rd Best Picture, ka-tie ang "Call Me Mother," Best Cinematography, Best Production Design, Best Sound, Best Musical Score, Best Original Theme Song na pinamagatang "Sandalan," at Gat Puno Antonio Villegas Cultural Award.

This is produced by MQuest Ventures, Cignal, and Spring Films, directed by Cannes-winning filmmaker Raymond Red.

Para sa akin, it's definitely worth the watch. Hindi ito tulad ng mga nakasanayan nating mga mainstream na pelikula. Showing pa rin ang "Manila's Finest" sa mga sinehan nationwide.

The post REVIEW: 'Manila's Finest' ni Piolo Pascual may ipinaglalaban, maraming hugot appeared first on Bandera.