Herlene Budol: Graduate ako pero ‘di ko talaga makuha-kuha ‘yang pag-i-English
NAGPAKATOTOO si Herlene Budol nang aminin niyang hirap na hirap talaga siyang magsalita ng straight English kahit pa seryoso niya itong pinag-aaralan.
Inamin ng Kapuso actress at beauty queen na mula noon hanggang ngayon ay problema niya ang pagsasalita ng English kahit pa nga nakapagtapos siya ng pag-aaral.
"Ayun nga 'yung problema ko. Tapos naman ako ng pag-aaral pero hindi ko talaga makuha-kuha 'yung pag-i-English na 'yun.
"Sa mga kabataan ngayon, kahit wala sa hitsura 'yung mga bagets, talagang may English," ang sabini Herlene sa "i-Listen with Kara David."
"Kita mo talagang uhugin (na bata), pero talagang, 'Mommy, why is my ganyan-ganyan?' May English 'day," aniya pa.
Ayon sa dalaga, yung mga cartoons daw kasi na pinanonood niya noong kanyang kabataan ay walang masyadong mga dialogue sa English.
"So wala akong natutunan sa kanila. Sabi ko, 'Malas ko naman nu'ng kabataan ko,'" natatawang sey pa ni Herlene.
Pero sabi naman sa kanya ni Kara, "Hindi naman sukatan ng katalinuhan ang pag-i-English."
Pero para kay Herlene, "Minsan kailangan talaga. Masarap din siguro pakinggan kapag marunong ka din mag-English."
Kaya nga raw mas trip ni Herlene kausap ni Herlene ang mga foreigner dahil hindi raw mga judgmental ang mga ito, hindi tulad ng ilang kapwa Pilipino.
"Pero mas masarap kausapin 'yung mga ibang lahi. Kasi mga kapwa kong Pilipino, sila pa 'yung perfectionist. Pero kapag ibang lahi, hindi ka dyina-judge," ani Herlene.
Nabanggit ni Kara ang manliligaw ngayon ni Herlene na si Kevin Dasom, na nakatrabaho niya sa Kapuso serye na "Binibining Marikit".
Sabi ng aktres, malaki ang pasasalamat niya kay Kevin dahil nagsisilbi itong tutor niya, "Siya rin kasi 'yung nagturo sa 'kin. 'Huwag kang mahiya. Kung gusto mo mag-English, mag-English ka lang.' Pero nakatulong siya."
Hirit pa niya, "'Yun nga hindi ko alam 'yun. Verb, noun, adjective. Totoo nga. Babalik nga ulit ako doon. Hindi maganda 'yung naging tutor ko.
"Promise talaga ha. Aalamin ko siya isang araw. May notebook ako, Ms. Kara. Ang pinag-aaralan ko ganu'n. Kasi 'pag nag-pretend pa ako ng tali-talinuhan, 'pag nagkamali ako, mas pagtatawanan ako," aniya pa.
Payo sa kanya ni Kara, "Basta itong tandaan mo, hindi nasusukat sa wika ang katalinuhan ng isang tao."
Huling hirit ni Herlene, "Sabi ko nga kung ako magiging artista sa ibang bansa, kung gusto ko, pipi. Para hindi ako mahirapan sa lines, mag-focus ako sa acting na lang, 'di ba?
"Malay mo naman. Kasi 'pag English, hindi talaga makakabuo ng isang sentence na tama," chika pa ni Herlene Budol.
The post Herlene Budol: Graduate ako pero 'di ko talaga makuha-kuha 'yang pag-i-English appeared first on Bandera.
Reviewed by pinoyako
on
November 22, 2025
Rating:
No comments: